Psalms 58

Ŋgeu eez ighason Maaron pa ighur atia pa yes daba samsamia

Mbouŋ to David

Paesiiŋ ila pa ŋgeu to imuuŋ pa mbouŋ tovene: Mbouŋ tonene aliŋa, nene: ‘Urewa malep.’

1Yam daba, alooŋ. Ŋgar to yam asasavia ne, nene deŋia?
Ve ighaze aŋgabiiz saveeŋ to tamtoghon ve aghur atia padi, yam ataghon ŋgar deŋia? Maau kat!

2Lolomim iyaryaaŋ pa ŋgar samia moghon, ve awaghamun tamtoghon irau ndug ndug.
3Ndiran samsamia, moghon moghon tiyel pa ataam poia.
Sawa to nditinandi tipoop di ve inim, avodi kaarom, ve tisosor pa ataam to Maaron.

4Saveeŋ to ivotvot ila avodi, nene iwaghamun tamtoghon inimale moot samia.
Ighaze tatoova pa tapasaluŋgan di, nene irau tilooŋ ghiit maau. Pasa, tipoon taliŋadi.
Yes tinimale moot to malmal to taliŋadi saambu maau. Tovenen ighaze moot tonowen tama ivib sab, leso ighami lolo poia ve imogheer, ye irau ilooŋ sab aliŋa maau.
6O Maaron, ndiran tonowen tinimale laion papaghu to matadi malmal.
Arab polpolin livodi, ve apas di! Leso tiwaghamun tamtoghon sob.

7Upasob di ve tilaledi tinimale ya to ireer ila le imaak.
Uvazag di ila aghem samba inimale tamtoghon tivazag kikiliiŋ le igorgor.

8Ugham di tinim demdem to timaat ve timbuuz.
Naghaze tinimale ndipain to timazug ila nditinandi apodi.
Irau tineep ve tighita ndag maau.
9Maaron pale rikia moghon iŋgor sawa todi inim tuku, inimale mbeb gorgori to yab ighani rikia.
Mbalmbali toni pale iza todi, ve ipasob di tilaledi tinimale buzbuz to yaghur iviviira ila.
10Ighaze tamtoghon deŋiadi tighita Maaron ighur atia pa ndiran samsamia ve iyat ŋgar todi, nene pale lolodi poia.
Ndiran samsamia siŋ todi pale ireer izi ve ipot izala taan pogho, ve tamtoghon deŋiadi tilaagh ila.

11Ghoro tamtoghon tisaav tighaze: “Onoon kat, Maaron inepneep, ve iŋgagabiiz tamtoghon to taan, ve ighurghur atia padi.
Ve yes to titaghon ŋgar deŋia, ye ighamgham ledi atia popoia.” ^a